Bible

1 約坦二十五歲个時做王，在耶路撒冷統治十六年。厥姆安到耶露莎，係撒督个妹仔。 2 約坦行上主看做著个事，學厥爸烏西雅个模樣，總係無像厥爸入去聖殿燒香來犯罪。人民還係繼續犯罪。 3 約坦起上主聖殿个北門，又在耶路撒冷个俄斐勒加起城牆。 4 佢在猶大个山區建設城鎮，在山林肚起城堡㧯守望台。 5 約坦攻打亞捫王㧯佢个軍隊，打贏佢等，強迫亞捫人向佢進貢三年，逐年愛繳三千四百公斤銀仔，一千公噸小麥，一千公噸大麥。 6 約坦一日比一日強大，因為佢忠心順從上主—佢个上帝。 7 約坦在位期間其他个事，戰爭、政策等，全部記在《以色列㧯猶大列王史》底背。 8 約坦二十五歲个時做王；佢在耶路撒冷統治十六年。 9 約坦死後葬在大衛城；佢个孻仔亞哈斯承接佢做王。